Djúsí og safarík kalkúnabringa

Laaaaaaang mest djúsí eldun á kalkún er að setja hann í pækil áður en maður eldar hann.  Ég hef verið að þróa þessa uppskrift undanfarin 12 ár og elda kalkúnabringur svona.

Hérna er uppskriftin af pæklinum.

Maður leggur bringurnar í hann kvöldið áður og geymir þær svo yfir nótt í pæklinum inní ísskáp. Þetta er dáltið stór uppskrift sem ég er með hérna en þið getið bara minnkað hana niður eftir því hversu mikið af kalkún þið eruð að elda.

5 stk kalkúnabringur
250 g gróft salt (sjálf nota ég himalæja salt í allt því mér finnst það best á bragðið)
170 g púðursykur
3 lítrar vatn
1 msk svört piparkorn
1 tsk einiber
4 cm rifin engiferrót
4 stk lárviðarlauf
4 stk kanilstangir
3 lítrar ískalt vatn

Aðferð:

Setjið allt hráefnið í pott og hitið þar til saltið og sykurinn er uppleystur. Leyfið vökvanum að kólna og bætið svo ískalda vatninu út í.

Leggið kalkúnabringurnar í vökvann og geymið þær yfir nótt í pæklinum inní ísskáp. Það er líka hægt að leggja þær í pækilinn snemma dags sem þið ætlið að elda þær en ég mæli frekar með hinu.

Takið svo bringurnar upp úr vökvanum og þerrið þær létt.

Eldið þær inní ofni í sirka 40 mínútur á 175° eða þar til kjarnhitinn hefur náð 72°c. Svo er gott að leyfa þeim að standa í svona 10 mínútur áður en þið skerið þær.

Það er líka hægt að gera þetta með heilan kalkún en þá þurfið þið að stækka uppskriftina og elda kalkúninn lengur eftir því hversu stór hann er.

Höfundur: Hrefna Sætran