Breytingar á áfengisgjaldi munu valda stórhækkun á áfengisverði og auka tekjur ríkissjóðs verulega

Á heimasíðu Ölgerðarinnar er tilkynning frá Andra Þór Guðmundssyni, forstjóra Ölgerðarinnar um að fyrirhugaðar breytingar á áfengisgjaldi og virðisaukaskatti á áfengi munu hafa í för með sér stórfelldar verðhækkanir á áfengi.

Hér að neðan er tilkynningin í heild sinni:

Fyrirhugaðar breytingar á áfengisgjaldi og virðisaukaskatti á áfengi munu hafa í för með sér stórfelldar verðhækkanir á áfengi, að óbreyttu. Einnig munu tekjur ríkissjóðs aukast verulega, en ekki standa í stað eins og haft hefur verið eftir fjármálaráðherra í fjölmiðlum.   Þetta er mat forvarsmanna Ölgerðar Egils Skallagrímssonar sem vara við þessum hugmyndum, eins og þær liggja fyrir nú.

Rætt er um að hækkun á áfengisgjaldi eigi að vega á móti lækkun virðisaukaskatts í 7% svo tekjur ríkisins standi í stað. Fyrirhuguð hækkun gerir þó gott betur enda er afleiðingin sú að verð á öllum tegundum áfengis mun hækka verulega sem munu færa ríkissjóði auknar tekjur sem mælast í milljörðum. Meðfylgjandi tafla sýnir þær breytingar sem verða á verði algengra tegunda af áfengi, nái þær tillögur fram að ganga sem nú er rætt um á þingi.

1. Tegund                                   Verð nú          Nýtt verð        Hækkun
2. Smirnoff 1 l                             4.250               5.410               27,3%
3. Brennivín 70 cl                        3.290               4.140               25,8%
4. Rosemount rauðvín 3l kassi    4.190               4.850               15,8%
5. Wolf Blass rauðvín 75cl          1.490               1.593                 6,9%
6. Opal vodkaskot                       3.290               3.720               13,1%
7. Grand Marnier líkjör               4.260               4.980               16,9%
8. Egils Gull 0,5 l                           199                  228               14,6%

Þessar verðbreytingar miðast við að virðisaukaskattur fari í 7% og áfengisgjald (vínandagjald) hækki um 58% eins og lagt er til í frumvarpi fjármálaráðherra.

Ölgerðin hvetur ráðamenn til að endurskoða þá hækkun sem verði á áfengisgjaldi í kjölfar lækkunar á virðisaukaskatti svo gjaldheimta standi í stað í heildina litið.

Greint frá á Egils.is