Aldursgreina vín með eindahraðli

Franskir vísindamenn hafa þróað aðferð við að nota eindahraðal til að aldursgreina vín, að því er ein þekktasta vísindastofnun Frakklands greindi frá í vikunni.

Aðferðin er í því fólgin, að finna út aldur glersins í vínflöskunum með því að greina röntgengeisla sem losna þegar flöskurnar eru settar undir jónabunu í eindahraðli.

„Með þessum hætti er unnt að staðfesta aldur og uppruna flöskunnar, og aldursgreina þannig gömul vín … án þess að opna flöskuna eða hafa á nokkurn hátt áhrif á innihaldið,“ sagði í tilkynningu frá Vísindarannsóknamiðstöð Frakklands (CNRS).

Með því að bera niðurstöðurnar saman við gagnabanka með nákvæmumum upplýsingum um 80 Bordeaux-flöskur frá 19. öld og fram til nútímans má fá vísbendingar um aldur margra vína.

Í eindahraðli eru eindir, eins og til dæmis elektrónur, látnar ná allt að ljóshraða og rekast á atóm til að hægt sé að greina uppbyggingu þess.

Greint frá á Mbl.is | Mynd: CNRS.fr | [email protected]