Sigurður Haraldsson hreppti titilinn Kjötmeistari Íslands

Sigmundur G. Sigurjónsson (til hægri) tók selfie mynd með meistaranum Sigurði Haraldssyni Kjötmeistara Íslands 2022

Meistarafélag kjötiðnaðarmanna hélt í fimmtánda sinn fagkeppni Meistarafélags Kjötiðnaðarmanna nú á dögunum. Verðlaunaafhending var haldin Hótel-, og Matvælaskólanum í Kópavogi.

Keppnin fór þannig fram að kjötiðnaðarmenn sendu inn vörur með nafnleynd til dómarahóps sem dæmdi vörurnar eftir faglegum gæðum. Hver keppandi mátti senda inn allt að 10 vörur til keppninnar.

Allar vörur byrjuðu með fullt hús stiga eða 50 stig. Dómarar leituðu síðan að öllum hugsanlegum göllum.

Við hvern galla sem fannst, fækkaði stig. Með þessu fyrirkomulagi geta margar vörur fengið gull, silfur eða brons verðlaun.

Gull: Til þess að fá gullverðlaun þarf varan að fá 49 til 50 stig og vera nánast gallalaus.

Silfur: Til þess að fá silfurverðlaun þarf varan að fá 46 til 48 stig og má aðeins vera með lítilsháttar galla.

Brons: Til þess að fá bronsverðlaun þarf varan að fá 42 til 45 stig.

Vörur í keppninni í ár voru 101 og fengu 72 vörur verðlaun, þar af fengu 53% innsendra vara gullverðlaun, 17% fengu silfurverðlaun og 30% fengu bronsverðlaun. Vörurnar voru dæmdar í húsnæði Hótel-, og Matvælaskólans í Kópavogi og þar gafst gestum og gangandi tækifæri til að skoða og smakka innsendar vörur.

Titilinn Kjötmeistari Íslands

Titilinn Kjötmeistari Íslands hlýtur sá kjötiðnaðarmaður sem fær flest stig samanlagt úr fimm stigahæstu vörum sínum.

Það var Sigurður Haraldsson kjötiðnaðarmeistari sem hreppti titilinn Kjötmeistari Íslands.

Starfsmenn keppninnar

Dómnefnd:

Eðvald Sveinn Valgarðsson, yfirdómari
Árni Níelsson
Arnar Sverrisson
Erla Jóna Guðjónsdóttir
Ómar B. Hauksson
Kristján G. Kristjánsson
Magnús Friðbergsson
Hreiðar Örn Zoega Stefánsson
Þorsteinn Þórhallsson

Ritari:
Björk Guðbrandsdóttir

Fagkeppnisnefnd MFK:
Formaður Jón Þorsteinsson
Sigurfinnur Garðarsson
Ingólfur Baldvinsson
Hafþór Hallbergsson

Um Meistarafélag kjötiðnaðarmanna

Meistarafélag kjötiðnaðarmanna var stofnað 5. febrúar 1990. Eitt af meginmarkmiðum félagsins er að vinna að aukinni menntun, verkkunnáttu og vöruvöndun í greininni. Svo og að standa fyrir kynningu og fræðslu á þeim sviðum er kjötiðnina varðar. Félagsmenn eru nú 88 kjötiðnaðarmeistarar starfandi í kjöt- og matvælavinnslum og öðrum matvælatengdum fyrirtækjum og stofnunum.

Mynd: Sigmundur G. Sigurjónsson