Stefna á 200 þúsund lítra á ári

Bjórverksmiðja mun hefja framleiðslu í Stykkishólmi á næsta ári, gangi áætlanir forsvarsmanna fyrirtækisins eftir. Þeir hafa stofnað fyrirtækið Mjöður ehf. um framleiðsluna, og hefur fyrirtækið þegar tryggt sér lóð í bænum. Fimm til sjö starfsmenn munu að líkindum starfa við verksmiðjuna.

„Sérstaða bjórsins okkar verður góður bjór úr góðu vatni,“ segir Gissur Tryggvason, einn forsvarsmanna bjórverksmiðjunnar sagði í viðtali við fréttablaðið. Nánari lýsingar á bjórnum fást ekki upp gefnar af samkeppnisástæðum, né heldur nafn bjórtegundarinnar.

Mikið á eftir að gera áður en fyrsti sopinn verður drukkinn, þótt búið sé að ganga frá kaupum á vatni. Byggja á nýtt hús fyrir verksmiðjuna, og eftir er að semja um kaup á tækjum. Bruggmeistarann vantar einnig, og segist Gissur reikna með að útlendingur verði ráðinn.

Fyrst um sinn reiknar Gissur með að bruggaðir verði um 200 þúsund lítrar á ári, sem jafngildir um 600 þúsund bjórflöskum, tveimur á hvern landsmann. Framleiðslan verður til að byrja með eingöngu seld hér á landi.

Gissur segir aðdragandann að stofnun bjórverksmiðju hafa verið nokkuð langan, en undirbúningur hafi ekki hafist af alvöru fyrr en í júlí síðastliðnum.

[email protected]

Auglýsingapláss