Nýr veitingastaður í Hrísey

Nýr veitingastaður hefur verið opnaður í Hrísey sem ber heitið Verbúðin 66 og er staðsettur við Sjávargötu 2.  Eigendur eru hjónin Linda María Ásgeirsdóttir og Ómar Hlynsson.

Ennþá er verið að prufukeyra opnunartímann fram á vor og er einungis opið um helgar, þ.e. á föstudögum frá klukkan 18:00 til 23:00, á laugardögum frá klukkan 16:00 til 23:00 og á sunnudögum frá 15:00 til 20:00.

Linda María segir í samtali við hrisey.is að stefnt verður á lengri opnunartíma í sumar sem verður auglýst á facebook síðu Verbúðarinnar þegar nær dregur sumri.

Einfaldur matseðill er á boðstólnum, hamborgarar með frönskum og sósu frá 1.900 til 2.100 krónur, grillaðar samlokur á 1.300 krónur og Nachos, salsasósa & sýrður rjómi á 500 krónur og þar með er allt upptalið.

Mynd: skjáskot af ja.is korti