Konunglegur matur á Friðrik V.

Við félagarnir tókum þá ákvörðun í indverska kjallaranum í mars, að næst skyldum við heimsækja Friðrik V. á Laugarveginum og nú var komið að því.

Þegar við vorum búnir að finna stæði, gengum við inn og var strax tekið á móti okkur og vísað til sætis, komið með matseðla og á meðan við skoðuðum hann var náð í drykkjarföng okkar sem samanstóð af 3 sódavatnsflöskum. Við ákváðum að fara í 5 rétta seðilinn og þá heyrðist fyrsta perla kvöldsins, en þjónustustúlkan spurði okkur hvort nokkur okkar hefði eitthvað matarofnæmi og var svar okkar nei, þessi litla spurning getur beinlínis breytt kvöldinu bæði fyrir staðinn og ekki síst viðskiptavininn.

Næst var Ofnbakaður þorskur frá Nýfisk í Sandgerði, hleypt andaregg frá Torfastöðum, humarhali, mysusósa og lífrænt ræktað bygg, þrjár tegundir rauðrófum, ferskar, marineraðar og mauk frá Vallarnesi, dill og spínat frá Lambhaga og rabbabarabalsamic sósa.

Og þegar þjónustustúlkan var búin að kynna réttinn, kom annar gullmoli, benti hún á fiskiskeiðina sem sett hafði verið á borðið og útskýrði noktun hennar, algerlega frábært og er þetta í fyrsta sinn sem ég sé sósuskeið notaða á veitingastað á Íslandi, þetta er alltaf á 2 og 3 stjörnu Michelinstöðum.  Hárfín eldun á fiskinum og egginu, glæsileg samsetning á brögðum.

Svo kom Humarsúpa eins elduð af Friðriki í 20 ár, með smá rjómi og nýmalað múskat yfir borið fram eins og cappuccino.

Þessi bolli steinlá, þvílíkur unaður að fá alvöru humarsúpu

Og Lamb á fjóra vegu: lambaöxl hægelduð þar til hún náði 57c, kindafille grillað, kindapylsu heimalöguð og smalabaka með lambi, kartöflurnar eru frá Gröf II í Eyjafirði, gulrætur frá Flúðum og rófur frá Hornafirði og baunir frá Spáni, gamaldags soðsósa, heimalöguð rabbabarasulta bragðbætt með vanillu og kanill.

Alveg ótrúlega flott samsetning, bragðið tært og ekkert bragð sem dómineraði, það var virkilega gaman að snæða þennann disk.

Pre dessert – Skurn af andaregginu frá Torfastöðum í Fljótshlíð, á Lækjartún í Ásahreppi býr kýrin Snotra sem bar sínum 3 kálfi 20. mars og fengum þau brodd úr henni sem úr varð broddbrúlé.

Einfaldur en svakalega bragðgóður.

Dessert: Frönsk súkkulaðikaka, súkkulaðimousse og þurrkaðari appelsínu, ávaxtasalat, berjaís úr rifsberjum, bláberjum að norðan og jarðaberjum frá Kristnesi og hunangsköku þurrkuð og maukuð og bláberjamarengs stráð yfir.

Þetta var hreint sælgæti að snæða og toppaði gjörsamlega æðislegt kvöld.

Ástæðan fyrir því að ég get verið svona nákvæmur í lýsingum er að tæknistjóri hópsins hann Sigurður tók upp á vídeó á símanum sínum alla kynninguna og sendi mér á tölvupósti, þannig að ég gat spilað trekk í trekk sömu kynninguna meðan ég var að skrifa textann.

Við vorum alveg svakalega ánægðir með þetta kvöld, matinn, þjónustuna umhverfið allt small þetta saman í ógleymalega stund.

Ef þetta er ekki Íslenskt eldhús í sinni víðustu merkingu, ja þá er það bara ekki til.

Myndir: Sigurður Einarsson
Texti: Sverrir