Vel heppnuð vélsleðaferð Freistingar

Nú hafa Freistingar meðlimirnir og fylgifiskar sem klifruðu upp Snæfellsjökul um helgina á jeppum, snjósleðum, snjóbrettum og tveim jafnfljótum skilað sér til byggða eftir frábæra ferð. Veðrið er eitt það fallegasta sem menn hafa séð á fjöllum á þessum árstíma og útsýnið einstakt.

Lagt var í’ann á föstudag og voru 3 jeppar, 3 snjósleðar og nokkur bretti með á fyrsta degi. Færið og leiðirnar á jöklinum var skoðað og svo vaknað snemma á laugardagsmorgun og jökullinn tekinn með trompi.

Snæfellsjökull telur tæpa 1200 metra, farið var upp á jeppa formanns Freistingar ásamt ferðafélögum. Færið var einstakt og nánast hægt að keyra upp að toppi á bíl. Dagurinn leið hratt og fór að skyggja um kl. 20.00 og bústaðurinn var ánægjuleg sjón þar sem fólk var búið að nýta alla orku sýna á frábærum degi.

Vel var tekið á vistum í föstu og fljótandi formi um kvöldið í félagsskap nokkurra þjóðverja sem snjósleðadeildin hitti fyrir á jöklinum. Á sunnudagsmorgni birtust nokkrir meðlimir Ung Freistingar og menn úr bransanum með bretti og voru efri hlíðar jökulsins vel nýttar allann sunnudaginn.

Hér fylgja nokkrar myndir úr ferðinni með og fleiri á leiðinni. Næsta ferð er nú þegar kominn vel á veg í undirbúningi og verður vel auglýst hér á síðunni. Fyrirhugað er að koma upp “hobbý” –tenglum hérna á síðunni þar sem menn geta hópað sig saman í sitt uppáhaldssport.

Allar hugmyndir/hobbý eru velkomnar og tengiliðir eru beðnir um að senda línu til Freistingar ef þeir hafa áhuga á að efla sitt sport og félagsskapinn. Það sem er nú í undirbúningi eru,- mótorsportklúbbur, golfklúbbur, brettaklúbbur, poolklúbbur, veiðiklúbbur, ferðaklúbbur o.fl, o.fl.

Þegar uppsetning og skipulagning á tenglum er lokið geta menn sent línu, skráð sig í uppáhaldsklúbbinn sinn og fengið svo sms eða tölvupóst frá félögunum þegar eitthvað er að gerast hjá viðkomandi klúbbi.

Hallgrímur Sigurðarson

Höfundur er Hallgrímur Sigurðarson matreiðslumeistari og formaður Freistingar.