Veitingastaður lokar á Garðskaga

Bæjarráð Sveitarfélagsins Garðs hefur tekið við erindi þess efnis að veitingastaðurinn Tveir vitar sem stafræktur hefur verið í húsnæði Byggðasafnsins á Garðskaga verði fluttur í annað sveitarfélag og að rekstraraðili muni skila sveitarfélaginu húsnæði veitingastaðarins í Byggðasafninu á Garðskaga 30. september næstkomandi, að því er fram kemur í blaði Víkurfrétta.

Þá hefur bæjaryfirvöld í Garði borist erindi er varðar ferðaþjónustu á Garðskaga.  Í erindinu er óskað eftir fundi um möguleika á samstarfi um leigu og rekstur fasteigna sveitarfélagsins á Garðskaga og hugsanlegt samstarf við sveitarfélagið um rekstur á Garðskaga.

Samþykkt var samhljóða á fundi bæjarráðs Garðs að vísa erindinu til stýrihóps um uppyggingu í ferðaþjónustu en áður hefur komið fram að bæjaryfirvöld vilja að öll ferðaþjónusta á Garðskaga sé á einni hendi og undir einni yfirstjórn.

Stýrihópur um stefnumótun um atvinnumál og ferðaþjónustu í Garði hefur fjallað talsvert um starfsemi og rekstur ferðaþjónustu og Byggðasafns á Garðskaga.

Bæjarráð Garðs samþykkti samhljóða s.l. vetur að fela stýrihópi að vinna frekari tillögur og útfærslu á rekstrafélagi sem annist allan rekstur og starfsemi Garðskaga.

Greint frá í blaði Víkurfrétta.

Mynd: Smári