Þýska kjötiðnaðarsýningin IFFA 2025: Stórviðburður fyrir fagfólk – Ísland tekur þátt í alþjóðlegri keppni

Mynd tekin þegar Ásbjörn Geirsson og Friðrik Björn Friðriksson sigruðu í Íslandsmóti matvæla- og veitingagreina í febrúar síðastliðnum. Frá vinstri: Stefán Einar Jónsson, þjálfari og dómari, Ásbjörn Geirsson og Friðrik Björn Friðriksson. Myndina tók Pétur Örn Pétursson fyrir hönd Iðunnar fræðsluseturs.

Í dag mun IFFA, ein mikilvægasta alþjóðlega fagsýning fyrir kjötiðnað og kjötvinnslu, opna dyr sínar að nýju fyrir gesti og sýnendur hvaðanæva að úr heiminum. Sýningin fer fram á þriggja ára fresti og hefur í rúmlega sex áratugi verið leiðandi vettvangur fyrir nýjungar og þróun í greininni. Að þessu sinni verður Þýska kjötiðnaðarsambandið (DFV) áberandi með eigin sýningarbás og umfangsmikið keppnissvæði í sýningarhöll 12.

Á jarðhæð hallar 12 verður einnig svokallaður Marktplatz des Fleischerhandwerks – markaðstorg kjötiðnaðarins – sem starfrækt er í samstarfi við kjötiðnaðinn. Þetta svæði þjónar sem mikilvægur samkomustaður fyrir bæði þýska og erlenda iðnaðarmenn og er ætlað að stuðla að tengslamyndun, þekkingarmiðlun og kynningu á nýjungum.

Ásbjörn Geirsson og Friðrik Björn Friðriksson mættir á keppnissvæðið. Myndina tók Stefán Einar Jónsson, kjötiðnaðarmeistari.

Ísland með í alþjóðlegri keppni

Ísland mun í ár taka þátt í sérstakri keppni á vegum Þjóðverja þar sem fimm þjóðir etja kappi – Þýskaland, Sviss, Írland, Austurríki og Ísland. Þessi keppni er hluti af undirbúningi fyrir EuroSkills 2025, sem fram fer í Herning í Danmörku, en íslenska liðið hefur þegar tryggt sér þátttökurétt þar. Keppnin á IFFA er því einstakt tækifæri fyrir íslenska keppendur til að mæta sterkum andstæðingum, skerpa leikni sína og kynna fagið fyrir alþjóðlegum vettvangi.

Ísland teflir fram tveimur keppendum – Ásbirni Geirssyni og Friðriki Birni Friðrikssyni – sem báðir hafa sýnt afburða hæfileika og metnað í kjötiðnaði. Með í för er Stefán Einar Jónsson kjötiðnaðarmeistari, sem gegnir tvíþættu hlutverki – hann er annars vegar þjálfari íslenska liðsins og hins vegar dómari í keppninni fyrir hönd Íslands.

Stefán segir að þessi þátttaka sé mikilvæg fyrir íslenskan kjötiðnað:

„Þjóðverjar hafa haldið landskeppni sína á IFFA sýningunni í mörg ár. Við fengum svo boð að vera með í þessari keppni ásamt Sviss, Írlandi, Austurríki og Frakklandi og þáðu allir boðið nema Frakkar. Með þessu er ég að vona að við getum auglýst fagið okkar og sýnt hvað það er fjölbreytt.“

Fjölmenni, nýsköpun og fagleg tengsl

Síðast var IFFA haldin árið 2022, einnig í Frankfurt, og þá sóttu hana yfir 50.000 gestir. Með yfir 1.000 sýnendum víðsvegar að úr heiminum er IFFA sannkallaður skylduviðburður fyrir alla sem vilja fylgjast með þróun og framtíðarmöguleikum í kjötiðnaði og tengdri starfsemi. Þar má meðal annars sjá lausnir og tæki sem hjálpa til við að auka veltu og hagnað í kjötvinnslum, sem og fá innsýn í hvaða viðskiptasvið og tækifæri kunna að vera áhugaverð til framtíðar.

Sýning þessi spannar breitt svið innan greinarinnar – allt frá slátrun, vinnslu og pökkun til markaðssetningar og sölu. Einnig eru kynntar lausnir fyrir flutnings- og geymslutækni, hreinlætismál í vinnslum, búnað fyrir verslanir, sem og upplýsingatækni sem nýtist í rekstri kjötvinnslufyrirtækja.

Veitingageirinn.is mun fylgjast náið með keppninni og greina frá framvindu hennar og árangri íslenska liðsins ásamt myndum.