Súkkulaðikaffihúsið Fríða opnar á ný eftir framkvæmdir

Fríða við nýja þjónustuborðið

Súkkulaðikaffihúsið Fríða á Siglufirði var lokað í janúar vegna framkvæmda en opnaði að nýju 1. febrúar s.l.

„Já, til að geta boðið upp á vöfflur þurfti ég meira pláss og þess vegna fór ég í þessa viðbót núna,“

segir Fríða í samtali við siglfirdingur.is, en þar á hún við nýtt þjónustuborð að austanverðu í aðalsalnum, sem auðveldar mjög alla afgreiðslu á téðri vöru. Framkvæmdir stóðu að mestu yfir í nóvember en verkið kláraðist fyrir skemmstu. Auk þess var bætt við nýjum kæli.

Súkkulaðikaffihús Fríðu Bjarkar Gylfadóttur að Túngötu 40a á Siglufirði er orðið þekkt kennileiti þar í bæ, þótt ekki séu nema rúm tvö ár síðan það var opnað, eða nánar tiltekið 25. júní 2016.

Sjá einnig: Nýtt kaffihús opnar á Siglufirði með eigin súkkulaðiverksmiðju

Þar hafa frá upphafi verið á boðstólum handgerðir konfektmolar úr úrvalssúkkulaði, belgísku, auk margs annars. Og heimafólk og ferðamenn, innlendir sem erlendir, hafa streymt þangað, auk þess sem hægt hefur verið að panta siglfirska dýrindið í gegnum vefsíðuna frida.is.

Nánari umfjöllun er hægt að lesa á siglfirdingur.is hér.

Mynd: siglfirdingur.is