Stærsta veisla í heimi hefst 21. mars næstkomandi – Íslensk veitingahús taka þátt í veislunni

Argentíski kokkurinn Mauro Colagreco frá franska 3 Michelin veitingastaðnum Mirazur tekur þátt í Good France veislunni.Þátttaka í veislunni hefur vaxið jafnt og þétt og í fyrra buðu 3.500 veitingahús í 152 löndum matseðla undir merkjum hennar.

Alþjóðlega veislan „Goût de / Good France“ verður haldin í fimmta skipti daginn eftir vorjafndægur, 21. mars næstkomandi.

Matseðlarnir í boði verða undir áhrifum frá Provencehéraði í Frakklandi sem skartar bæði skíðasvæðum í Alpafjöllum, sólarströndum við Miðjarðarhaf og öllu þar á milli.

Þátttaka í veislunni hefur vaxið jafnt og þétt og í fyrra buðu 3.500 veitingahús í 152 löndum matseðla undir merkjum hennar, að því er fram kemur fréttatilkynningu frá Franska sendiráðinu.

Íslensku veitingahúsin, sem taka þátt í veislunni að þessu sinni, eru AALTO Bistro, The Lobsterhouse og Le Bistro, öll í Reykjavík, og í fyrsta skipti nær veislan út fyrir Reykjavík því Múlaberg bistro & bar á Akureyri hefur nú slegist í hópinn.

Frönsk matgerðarlist er á heimsminjaskrá Sameinuðu þjóðanna og það sem hefur jafnan einkennt hana er virðing fyrir hráefnunum og umhverfinu, að neyta þess sem fæst á næstu grösum, samneyti, gleði og lífsnautn. Og í veisluréttunum er kappkostað að stilla fitu-, sykur- og saltnotkun í hóf.

Mynd frá facebook síðu Good France