Kokkar á kajak – Vatnselgur á Höfn

Ófært er víða um bæinn í Höfn í Hornafirði vegna mikils vatnselgs og víða hefur flætt inn í hús. Slökkvilið og bæjarstarfsmenn dæla látlaust og hafa vart undan. Í húsi við Höfðaveg er ökkladjúpt vatn á neðri hæð og hafa húseigendur dælt í alla nótt og óskuðu í dag eftir aðstoð frá slökkviliðinu. Svæðið frá Sparisjóðnum og að Heppuskóla er allt á kafi í vatni og langt út á fótboltavöll.

Rignt hefur látlaust síðan í gærmorgun og mældist sólarhringsúrkoma í Akurnesi 149 mm. Útlit er fyrir að heldur dragi úr rigningunni seinna í dag útlit er fyrir mikilli rigningu á morgun.

Fimmtíu manna hópur frá Seyðisfirði sem ætlaði á frumsýningu á Hótel Höfn í kvöld varð innlyksa á Djúpavogi í nótt en skriðurnar voru lokaðar þangað til seinni partinn í dag. Fjölmargir vöruflutningabílar voru einnig veðurtepptir á Höfn í nótt.

Á myndinni eru kokkarnir og húmoristarnir Óðinn Eymundsson og Kristján  Guðnason á eina farartækinu sem dugði á Höfn í dag.

Greint frá á fréttavef Hornafjarðar
Mynd: Hornafjarðarvefur

[email protected]