Kjötsúpudagurinn tileinkaður minningu Úlfars Eysteinssonar matreiðslumeistara

Fyrir miðju, feðgarnir Úlfar Eysteinsson og Stefán Úlfarsson

Kjötsúpudagurinn er haldinn hátíðlegur á Skólavörðustíg í dag laugardaginn 27. október, fyrsta vetrardag.

Eins og venjulega verður boðið upp á rjúkandi heita íslenska kjötsúpu á Skólavörðustígnum. Þetta er 16. árið í röð sem vetri er fagnað á þennan hátt. Það eru sauðfjárbændur, Íslenskt grænmeti og rekstraraðilar og íbúar á Skólavörðustígnum sem bjóða gestum og gangandi að bragða á ilmandi, heitri og bragðgóðri súpu.

Alls munu 1500 lítrar af súpu vera á boðstólum en það er rík hefð fyrir því að hún klárist.

Bjarni Viðar Þorsteinsson yfirkokkur á Sjávargrillinu og Gústav Axel Gunnlaugsson eigandi á Kjötsúpudeginum í fyrra

Alls verður boðið upp á kjötsúpu á sjö stöðum á Skólavörðustígnum og það eru margir af fremstu matreiðslumönnum landsins sem gefa vinnu sína á þessum degi auk þess sem ætla sauðfjárbændur að taka þátt í því að útdeila súpunni. Klukkan. 14 verður byrjað að gefa súpu á sjö stöðum.

Staðsetning súpustöðva.

Kol – Skólavörðustíg 45
Kolabrautin – Skólavörðustíg 28
Krua Thai Skólavörðustíg 21a
Snafs – Skólavörðustíg 20
Sjávargrillið – Skólavörðustíg 14
Þrír Frakkar – Skólavörðustíg 9
Ostabúðin – Skólavörðustíg 5

Dagskráin hefst kl. 14.00 og stendur fram til kl. 16. eða á meðan birgðir endast. Einstakt andrúmsloft hefur myndast á Skólavörðustígnum í hvert sinn sem vetri er fagnað með krassandi kjötsúpu. Fjöldi skemmtiatriða verður í boði um alla götuna. Sjón er sögu ríkari.

Úlfar Eysteinsson og hans fólk á Þremur frökkum hafa tekið þátt frá upphafi eða í 16 ár

Þessi Kjötsúpudagur er tileinkaður minningu Úlfars Eysteinssonar matreiðslumanns. En Úlfar og hans fólk á Þremur frökkum hafa tekið þátt frá upphafi eða í 16 ár.

Myndir: facebook / Skólavörðustígur