Keppni í jólapúns í Jólaportinu: Veitingahús etja kappi til styrktar Sorgarmiðstöðinni

Barþjónaklúbbur Íslands stendur fyrir skemmtilegri og gefandi keppni í Jólaportinu í Kolaportinu laugardaginn 6. desember frá klukkan 15 til 18 þegar Jólapúns, árleg keppni Barþjónaklúbbs Íslands, fer nú fram í Kolaportinu í fyrsta sinn.

Þar munu nokkur hæfustu veitingahús Reykjavíkur takast á um titilinn besta jólapúnsið, bæði í áfengri og óáfengri útgáfu, og má búast við fjölbreyttu úrvali bragðsamsetninga í anda aðventunnar.

Gestir geta keypt drykkjarmiða á staðnum þar sem einn miði jafngildir einum drykk. Allur ágóði rennur óskertur til Sorgarmiðstöðvarinnar sem styður sorgarbörn og fjölskyldur á erfiðum tímum. Sá veitingastaður sem safnar flestum drykkjarmiðum hlýtur titilinn sigurvegari og fær þann heiður að afhenda styrkinn til Sorgarmiðstöðvarinnar að keppni lokinni.

Aðstandendur hvetja gesti til að koma við, upplifa jólalega stemningu, bragða á spennandi jólapúnsi og styrkja um leið afar dýrmætt samfélagsverkefni.

Verð:
1 miði = 1.500 kr.
5 miðar = 6.000 kr.
10 miðar = 10.000 kr.

Mynd: bar.is