Hestamaður í Reykjavík | Café Loki og Askur | Veitingarýni

Í tilefni tónleika Helga Björnssonar og Reiðmenn Vindanna, var þessi dagur tileinkaður matarmenningu hestamanna

Ég hafði haft samband við félaga mína sem eru forfallnir hestamenn og sagt þeim hvaða hugmynd ég bæri í kollinum og hvort þeir gætu leiðbeint mér hvað það væri sem þessi söfnuður væri að borða nú um stundir og kemur hér niðurstaðan.

Í hádeginu fór ég á Cafe Loka og fékk mér:

Kjötsúpa

Hún var eins og kjötsúpa var í gamla daga, laus við alla tilraunastarfsemi, bara þetta gamla góða bragð og það kröftugt

Nýbökuð flatkaka með hangikjöti, baunasalati og rófustöppu

Smakkaðist það alveg svakalega vel, kakan volg, safaríkt og vel soðið hangikjöt, baunasalatið klassískt, en fyrir minn smekk hefði ég sett smá sykur í rófustöppuna.

Hér er Siggi Valur við nær fullbúna mynd
Myndir af listaverkinu: Café Loki

Listaverkið sem er nýbúið að mála á einn vegginn á Loka er eftir Sigga Val og Raffaella og er tilkomumikið að sjá þetta verk sem er úr goðafræðunum og enn ein ástæðan til að heimsækja Loka.

Fór ég glaður í bragði út eftir velheppnaðan hádegisverð og fór á rúntinn.

UM sexleitið var ég mættur inn á Ask en þar skyldi kvöldverðurinn snæddur, var mér vísað til borðs og boðinn matseðill og eftir smálestur var ég klár.

Í forrétt pantaði ég:

Rækjukokteill
Þessi gamli góði með ristuðu brauði

Var hann mjög góður, utan þess að á honum var hrár rauðlaukur, varasamt.

Í aðalrétt pantaði ég:

Grilluð nautalund
með snöggsteiktu grænmeti, bakaðri kartöflu og Bearnaisesósu

Fyrsti bitinn var seigur og kartaflan svo heit að ekki var hægt að borða hana, lét ég líða ca 5 -6 mínútur og reyndi aftur þá var kjötið orðið meyrt og hitinn á kartöflunni orðinn passlegur, kjötið var bragðgott, sósan guðdómleg, hvítlaukssósan í kartöflunni himnesk, en grænmetið alveg bragðlaust og að mestu undir steikinni, þannig að diskurinn sem slíkur minnti á hóla í eyðimörk.

Í ábætir pantaði ég:

3 laga súkkulaðiköku með þeyttum rjóma

Var hún alveg svakalega stór, en mjög góð, ekki of sæt, en ég orkaði ekki meiru en ½ skammt, þá var ég sprunginn.

Þjónustan var góð og alltaf stutt í einhvern af þeim, flott.

Það fór einn þokkalega glaður út í bíl, til að keyra á næsta stað sem var Harpan, en var mæting kl 20:00 á tónleika Helga Björnssonar og Reiðmanna Vindanna og þvílíkt fjör, sem maður fékk gæsahúð trekk í trekk yfir söng Helga og músíkinni, að unaðsleg tilfinning að upplifa það trekk í trekk hvað við eigum marga flotta fagmenn í músíkinni.

Þegar ég kom heim um hálf tólf, var bensínið eiginlega búið á kallinum og gott að komast í koju og inn í draumaveröldina og dreyma um hesta.

/Sverrir