Frábær Freistingafundur á Vox

Góð mæting og miklar umræður voru á Vox sunnudaginn 11 mars síðastliðin. Brunch-inn var skoðaður rækilega við góðar undirtektir fundarmanna sem ákváðu meðal annars að árshátíð Freistingar yrði haldin í kóngsins Kaupmannahöfn sunnudaginn 20. maí n.k.

Nefndin var sett á fullt með að skipuleggja flug, veitingastað, gistingu og fleira. Pálmi Sous chef á Vox var úthlutað að skipuleggja skemmtanir og leiðsögu um borgina, þar sem hann er nánast infæddur, og sjá til þess að engum leiðist.

Áveðið var að óska eftir leiðsögn í Carlsberg verksmiðjuna til þess að kynna sér framleiðsluna og mögulega smakka á. Gist verður eina nótt og fyrirhugað að fljúga út að morgni sunnudagsins og heim á mánudeginum. Skráning í ferðina er með þeim hætti að þú sendir tölvupóst á netfangið: [email protected] og ekki seinna vænna að skrá sig, þar sem hótelgisting og flugfar verður staðfest í síðasta lagi, með greiðslu viðkomandi, 3. apríl. Kostnaðaráætlun er í vinnslu og hefur Freisting ákveðið að greiða niður ferðina fyrir félagsmenn að einhverju leyti, en sú upphæð verður ákveðin á næsta fundi þriðjudaginn 3. apríl. á Icelandic fish and chips Tryggvagötu 8 þar sem Björgvin Mýrdal ætlar að taka vel á móti okkur.

Eftirfarandi er matseðillinn sem verður í boði 3. apríl frá Icelandic fish & chips:

Súpa dagsins. Borin fram með speltbrauði og hummus

*

Djúpsteiktur þorskur og rauðspretta, ásamt stökkum kartöflum og þremur tegundum af ‘Skyronnaise’ sósum

*

Bláberjaskyr með rjóma að hætti hússins

*

Kaffi eða te

Bókasjóður Freistingar ákvað einnig að styrkja Hótel og matvælaskólann í Kópavogi um 60.000.- kr. í formi bóka fyrir bæði framreiðslu,- og matreiðsludeildir skólans. Rætt verður við deildastjóra þessara deilda um á hvaða bókum er mest þörf til þess að tryggja sem mesta notkun og gera góða fagmenn framtíðarinnar enn betri.

Freisting þakkar sunnudagsvaktinni á kærlega fyrir frábæran Brunch og greinileg ástæða fyrir miklum vinsældum sunnudagana á Vox.

Kær kveðja
Hallgrímur Friðrik Sigurðarson
[email protected]
Forseti Freistingar