Fær ekki leyfi fyrir hótelskipi

Úlfar Eysteinsson, matreiðslumaður og eigandi veitingastaðarins Þrír frakkar, verður ekki með á Fiskideginum mikla þetta árið og hefur ákveðið að sniðganga Dalvík endanlega eftir að hafnarstjórn Dalvíkur ákvað að veita Úlfari ekki leyfi til að reka hótelskip í höfninni.

Þetta segir Úlfar í samtali við DV en honum finnst þessi ákvörðun vægast sagt sláandi í ljósi þess að hótelskipið yrði mikil aukning við ferðaþjónustu í bænum auk þess sem fjöldi starfa hefðu fylgt rekstrinum.

Maður skilur ekki svona. Í skipinu, sem er hið glæsilegasta og var allt endurnýjað árið 2011, er 120 manna veitingastaður og 62 hótelherbergi. Við ætluðum að hafa opið allt árið en það er engin slík þjónusta á svæðinu.

Úlfar er einn af upphafsmönnum Fiskidagsins mikla og hefur í 13 ár unnið sem sjálfboðaliði við að „koma Dalvík á kortið“ með hátíðinni sem hefur vaxið fiskur um hrygg í gegnum árin.

Við erum þrír aðilar sem eigum skipið. Við byrjuðum í Hafnarfirði en þegar í ljós kom að skipið gæti ekki verið þar, vegna breytinga á höfninni, horfðum við til Dalvíkur. Ég hélt að þar ætti ég hauka í horni þar sem ég er búinn að hjálpa þeim mikið með Fiskidaginn.

Úlfar segir að sótt hafi verið um leyfi fyrir að hafa hótelskipið í höfninni á Dalvík síðasta haust. Á fundi hafnarstjórnar í síðustu viku kom í ljós að ekki væri áhugi fyrir því að hafa hótelskipið í höfninni.

Þetta var endanlegt svar. Þeir sögðu að þetta myndi trufla aðra starfsemi við höfnina,

segir Úlfar og bætir við að um 15 til 30 störf hefðu skapast á svæðinu.  Úlfar telur að tveir til þrír valdamiklir aðilar í bænum séu í raun þeir sem standi í vegi fyrir því að hótelskipið fái að vera í höfninni.

Það eru öfl á móti okkur, við höfum frétt af því. Ég verð því að játa mig sigraðan,

segir Úlfar í samtali við DV og bætir við að hann muni sniðganga Dalvík hér eftir.

Greint frá á dv.is

Mynd: Skjáskot af frétt á dv.is

/Theodór Páll