Eliza Reid forsetafrú afhenti Íslensku lambakjötsverðlaunin

Award of Excellence viðurkenningar Icelandic Lamb voru veittar í fjórða sinn í dag

Award of Excellence viðurkenningar Icelandic Lamb voru veittar í fjórða sinn við hátíðlega athöfn síðdegis í dag, en það er Markaðsstofan Icelandic Lamb sem veitir veitingastöðum sem skarað hafa fram úr á liðnu ári viðurkenningarnar.

Horft var til framreiðslu staðanna á íslensku lambakjöti og áherslu þeirra á matseðli og markaðssetningu.

Eliza Reid, forsetafrú, ávarpaði samkomuna og veitti viðurkenningarnar, sem í ár var skipt í þrjá flokka en með þeirri skiptingu var tryggt að flóra íslenskra veitingahúsa endurspeglist í hópi viðurkenningahafa.

Flokkarnir þrír voru; Sælkeraveitingastaðir (fine dining), Bistro og Götumat (casual dining).

Viðurkenningu í ár hlutu eftirfarandi staðir:

Sælkeraveitingastaðir
Geysir Hótel Restaurant
Hver Restaurant
Silfra Restaurant
Einnig voru tilnefnd: Geiri Smart og Fiskfélagið.

Bistro
Heydalur
KK Restaurant
Mímir
Einnig voru tilnefnd: Lamb Inn og Forréttabarinn.

Götumatur
Fjárhúsið
Lamb Street Food
Le Kock
Einnig voru tilnefnd: Shake & Pizza og Icelandic Street Food.

Um 180 veitingastaðir eru í samstarfi við Icelandic Lamb um notkun á félagamerki við kynningu og markaðssetningu á íslensku lambakjöti og lyfta upp sérstöðu þessarar gæðavöru. Frú Eliza Reed forsetafrú ávarpaði gesti og fagnaði hún þeim árangri sem náðst hefur i markaðssetningu á Íslensku lambakjöti til ferðamanna með átaksverkefninu.

Hún sagði að hægt væri að draga þá ályktun að starf Icelandic Lamb og notkun samstarfsaðila á merki þess hafi skilað allt að 23% aukningu á neyslu ferðamanna á íslensku lambakjöti. Hún minnti sérstaklega á mikilvægi þess hlutverks sem veitingastaðir og matreiðslumenn spila þegar kynna á land og þjóð erlendis,

„Matur er besta leiðin til þess að kynna fólki fyrir íslenskri hefð og menningu. Þegar ég er erlendis finnst mér alltaf gaman að tala um matarmenninguna hér og ekki síst íslenskt lambakjöt,“

sagði Frú Eliza Reid forsetafrú í ávarpi sínu.

Í ár sátu Sæmundur Kristjánsson, Guðbjörg Gissurardóttir og Pétur Snæbjörnsson í dómnefnd, en hún lagði mat á markaðs- og kynningarefni staðanna, þátttöku þeirra í samstarfsverkefninu, nálgun þeirra að lambakjöti, og hráefnaval.

Mynd: aðsend