Danól boðar allt að 15% verðhækkun á matvörum

Heildverslunin Danól hefur tilkynnt um verðhækkanir á einstaka vörum og nema verðhækkanirnar allt að 15%

Er þetta mesta verðhækkun sem Neytendasamtökin hafa skráð hjá sér frá því samtökin hófu að fylgjast náið með verðbreytingum vegna lækkunar virðisaukaskatts á matvælum 1. mars sl. Markaðsstjóri Danóls segir erlendar verðhækkanir skýra verðhækkunina.

Vörurnar sem um ræðir eru hafragrjón og hrísmjöl frá Ora, Merrild-kaffi og Quaker kornvörur. Að auki hækkaði Danól ýmsar aðrar vörur sínar um 3-5% í janúar síðastliðnum. Fyrirtækið er stærsta innflutnings- og dreifingarfyrirtæki landsins í almenni matvöru.

Eftir því sem kemur fram á heimasíðu Neytendasamtakanna, voru skýringar birgja á vöruhækkunum í janúar og febrúar þær að um viðbrögð við gengislækkun krónunnar í lok síðasta árs væri að ræða. Frá áramótum hefur krónan styrkst og því hafa Neytendasamtökin kallað eftir lækkun hjá birgjum.

Pétur Kristján Þorgrímsson, markaðsstjóri hjá Danól, sagði í samtali við Fréttavef Morgunblaðsins að erlendar verðhækkanir skýrðu nú hækkanir fyrirtækisins á ýmsum vörum.

Greint frá á Mbl.is

[email protected]