Bríet Berndsen í æfingabúðir í Sviss – Fylgist með á snapchat

Kjötiðnaðarneminn Bríet Berndsen Ingvadóttir er lent í Sviss, en þar mun hún æfa næstu daga fyrir Euroskills keppnina sem haldin verður í borginni Gdańsk í Póllandi í haust 2023.

Það er Verkiðn og Matvís sem meðal annars standa að æfingabúðunum í Sviss og er skipulagt af yfirdómara kjötiðnaðar Euroskills keppninnar.

Bríet Berndsen Ingvadóttir, Stefán Einar Jónsson og Kristján Hallur Leifsson

Með Bríet í för eru kjötiðnaðarmeistararnir Kristján Hallur Leifsson þjálfari og Stefán Einar Jónsson liðsmenn í Landsliði Kjötiðnaðarmanna.

Til stóð að Björn Mikael Karelsson átti að keppa í Euroskills í haust en hann bar sigur úr býtum í Íslandsmóti iðn- og verkgreina sem haldin var í mars sl., en sigurvegari öðlast þátttökurétt á Euroskills. Björn Mikael þurfti að láta frá sæti sínu í keppninni þar sem konan hans er sett á sama tíma og keppnin í Póllandi fer fram og Bríet var næst í stigum.

Á Euroskills í haust munu 32 lönd senda sína færustu ungmenni til að taka þátt í 43 mismunandi greinum.

Æfingabúðirnar eru haldnar í bænum Spiez í Sviss en þar munu kjötiðnaðarnemar frá Austurríki, Þýskalandi, Frakklandi og Sviss æfa fyrir Euroskills keppnina.  Íslenska teymið flýgur heim á miðvikudaginn næstkomandi.

Er þetta í fyrsta sinn sem keppt er í kjötiðn á Euroskills og til gamans getið að það eru allar greinar hjá Matvís sem munu keppa í Euroskills í haust, matreiðsla, framreiðsla, bakara og kjötiðn.

Bríet er kjötiðnaðarnemi hjá Sláturfélagi Suðurlands og er á 2. ári í náminu.

Hægt er að fylgjast með herlegheitunum á snapchat: Veitingageirinn

Myndir: Skjáskot úr snapchat-i veitingageirans