Brauðhleifur ársins úr Hafnarfirði

Tveir bakarar úr Hafnarfirði urðu hlutskarpastir í keppninni um brauð ársins þar sem skilyrði var að í það minnsta fjórðungur hráefnisins væri íslenskt bygg frá Þorvaldseyri.  Það voru þeir Jón Rúnar Arilíusson og Nikulás Ágústsson úr bakaríinu Kökulist í Hafnarfirði sem unnu með bygghleif frá bakaranum góða, eins og þeir nefna brauðið. Segir Jón Rúnar að brauðið sé bakað eftir aðferðum aftan úr grárri forneskju.

Þetta er í þriðja sinn sem fyrirtækið Kornax efnir til þessarar keppni og var þátttaka góð, 17 brauð bárust frá níu bakaríum. Verðlaunin voru afhent á kornakri Ólafs á Þorvaldseyri 29 júlí s.l. en um það sá Jón Bjarnason landbúnaðarráðherra. Brauðið verður kynnt og auglýst sérstaklega í haust og verður á boðstólum í mörgum bakaríum, en þá má nú þegar fá í Kökulist.

Kornræktarævintýri Ólafs Eggertssonar á Þorvaldseyri vindur vel fram en hann hefur selt um 14 tonn af byggi og hveiti frá því hann hóf að markaðssetja það á bóndadaginn í vetur. Hann segist vera undir það búinn að eftirspurnin aukist með þessari og öðrum auglýsingum og reiknar með að taka 30-50 tonn af uppskeru haustsins frá til þess að sinna þessu verkefni. Repjan sprettur vel þessar vikurnar á Þorvaldseyri en þar er í gangi tilraun til að hefja framleiðslu á lífeldsneyti. Er undirbúningur að skurði og vinnslu þegar hafinn.

Mynd sem fylgir fréttinni tók Jónas Erlendsson í Fagradal við athöfnina sem fór fram innan um vetrarhveiti Ólafs.

Greint frá í Bændablaðinu

/Smári

Auglýsingapláss