Nýtt sterkt hveiti frá Kornax – Manitoba nýtist vel í súrdeigsbakstur

Undanfarna mánuði hafa matvæla og gæðasvið Líflands/Kornax staðið í ströngu við að þróa nýtt sterkt hveiti sem nýtist vel í súrdeigsbakstur og annan bakstur þar sem þörf er á sterku hveiti.

Við heyrðum í Jóhannesi Frey Baldurssyni, deildarstjóra matvælasviðs Líflands/Kornax og spurðum hann út í hvers vegna farið var í að framleiða þetta nýja hveiti?

„Við erum í sífelldri þróun með hveitið okkar og reynum að fylgjast vel með því sem er að gerast á markaðnum, til þess að geta mætt þörfum viðskiptavina okkar.

Við höfum séð að súrdeigsbakstur hefur verið að færast í vöxt í bakaríum og að sama skapi hefur eftirspurn eftir sterkara hveiti aukist til þess að mæta þeim þörfum sem góður súrdeigsbakstur krefst.

Við höfðum áhuga á að taka þátt í þessari þróun með viðskiptavinum okkar og úr varð að setja á markaðinn þetta nýja hveiti sem heitir Kornax Manitoba. Þetta sterka hveiti uppfyllir alþjóðlega gæðastaðla sem Manitoba hveitið er þekkt fyrir og er nú komið á lager hjá okkur í 25 kg. pokum til þess að byrja með.

Hugmyndin er síðan að koma þessu inn á neytendamarkaðinn líka þegar fram líða stundir þar sem brauðabakstur í heimahúsum hefur aukist gríðarlega að undaförnu og margir farnir að reyna sig við súrdeigsbaksturinn“

segir Jóhannes.