Hæstiréttur húðskammar Matvælastofnun fyrir framgöngu sína í máli Gæðakokka

Gæðakokkar sýknaðir í nautabökumáli.
Eigendur Gæðakokka voru hjónin Þ. Magnús Nielsson Hansen matreiðslumeistari og Vala Lee Jóhannsdóttir.
Mynd: skjáskot af heimasíðu Gæðakokka

Hæstiréttur hefur staðfest dóm Héraðsdóms Reykjavíkur um að Matvælastofnun væri skaðabótaskylt vegna fréttar sem birtist á vef stofnunarinnar um að ekkert nautakjöt væri í nautabökum frá matvinnslufyrirtækinu Gæðakokkum.

Á vef Ríkisútvarpsins kemur fram að Hæstiréttur húðskammar Matvælastofnun fyrir framgöngu sína í málinu, meðferð þess hafi verið ólögmæt og hafi auk þess verið slíkum annmörkum háð af hálfu starfsmanna MAST að skilyrði um saknæmi hafi verið fullnægt. Matvælastofnun beri því ábyrgð á tjóni fyrirtækisins.

Vefur Matvælastofnunar birti frétt þess efnis í febrúar fyrir fjórum árum að ekkert nautakjöt væri nautaböku frá Gæðakokkum í Borgarnesi.

Fyrirtækið var síðan kært til lögreglu og loks ákært fyrir vörusvik en sýknað í Héraðsdómi Vesturlands.  Dómurinn taldi að rannsókn málsins hefði verið ábótavant, aðeins eitt sýni hefði verið tekið og þessi mistök ekki gerð af ásetningi, að því er fram kemur á ruv.is sem fjallar nánar um málið hér.