Asía á Laugaveginum lokar eftir 27 ár – Uppfært

Veitingahúsið Asía hefur verið starfrækt við Laugaveg í 27 ár.

Veitingastaðurinn Asía á Laugaveginum lokar fyrir fullt og allt 1. janúar næstkomandi eftir 27 ár í veitingabransanum.  Eigandinn Óli Kárason Tran segir að hann ætli að snúa sér að einhverju öðru, aðspurður um hvað tekur við.  Óli vill ekki tjá sig um hvaða fyrirtæki kemur til með að taka við, en segir að það sé ljóst að forsendur eru tilvalin fyrir veitingastað, að því er fram kemur á mbl.is.

Mikil eftirspurn er eftir húsnæði fyrir veitingahús og öðru í miðbæ Reykjavíkur, en búið er að fylla veitingareksturskvótann á miðborgarsvæðinu og því er hart keppt um að fá veitingarými.

Uppfært: 3. desember 2015 – 12:45

Joe & the Juice stefnir á að opna veitingastað við Laugaveg 10 þar sem Veitingahúsið Asía hefur verið í rekstri síðustu 27 árin.

Það eru viðræður í gangi og verið að skoða hvernig Joe & the Juice myndi passa þarna inn enda er þetta allt of stórt húsnæði allt í heildina fyrir Joe and the Juice,

segir Daníel Kári Stefánsson, framkvæmdastjóri Joe & the Jucie á Íslandi í samtali við visir.is.

Veitingahúsið Asía tilkynnti á Facebook síðu sinni að það myndi loka á nýju ári við lítinn fögnuð aðdáenda staðarins. Nokkrir þeirra hafa þakkað Asíu fyrir viðskiptin í gegnum árin á meðan aðrir spyrja hvað þeir þurfi að koma oft til að koma í veg fyrir að staðnum verði lokað.

Daníel segir að eigendur Asíu hafi gert samning um að leigja húsnæðið til nýs aðila frá og með 1. febrúar næstkomandi og Joe & the Juice sé í viðræðum við þann aðila.

Við erum að skoða mögulegar lausnir af því hvernig Joe & the Juice passar þarna inn,

segir hann.

Joe & the Juice rekur fyrir veitingastaði sem selja einna helst samlokur og safa í Leifsstöð, Kringlunni, Smáralind og húsnæði World Class í Laugum. Fyrirtækið hagnaðist um 18 milljónir á síðasta ári, að því er fram kemur á visir.is.

Mynd: skjáskot af google korti.