Sleikti skeið og stakk henni í sósuna í beinni á RÚV | Harma þessi mistök og biðjast afsökunar

Umrædda atvik

Garðar Kári Garðarsson, yfirmatreiðslumaður á Strikinu á Akureyri, var staðinn að því í beinni útsendingu að smakka sósu með sömu skeið og hann notaði síðan til að skenkja á diska viðskiptavina.  Það var visir.is sem vakti athygli á málinu, en þetta gerðist í beinni útsendingu á RÚV.

Tilkynning frá Strikinu:

Tilkynningin á facebook síðu Striksins

Í kvöldfréttartíma RÚV í gær þar sem verkfall starfsgreinasambandsins var til umfjöllunar var viðtal við yfirmatreiðslumann okkar á Strikinu, Garðar Kára Garðarsson um áhrif verkfallsins á starfsemi veitingastaðarins en 80% af okkar starfsfólki er í verkfalli. Garðar Kári var, ásamt einum öðrum að afgreiða um 120 manns um leið og hann var í viðtali í beinni útsendingu á RÚV. Undir þessu mikla álagi gerði hann þau mistök að nota skeiðina sem hann hafði smakkað sósuna með, til þess að skammta á diskana. Myndatökumaður RÚV benti strax á þetta þannig að maturinn fór aldrei til gestanna en það sést ekki í myndskeiðinu á RÚV þar sem útsendingu var lokið.

Við hörmum þetta atvik og biðjumst afsökunar á því. Við erum búin að ræða málið innanhúss og munum sjá til þess að þetta gerist ekki aftur enda eru svona vinnubrögð með öllu óásættanleg. Þessi mistök skrifast alfarið á of mikið álag og undirmönnun vegna verkfallsins. Þetta eru ekki vinnbrögð sem Garðar Kári viðhefur að öllu jöfnu, hann er þaulreyndur matreiðslumaður og í kokkalandsliðinu.

Við vonum að verkfallið leysist sem fyrst þar sem það segir sig sjálft að ekki er endalaust hægt að keyra á örfáum starfsmönnum, hvorki á okkar veitingastað né á öðrum vinnustöðum landsins. Þetta ástand bíður upp á mistök sem þessi.

Segir í tilkynningu sem birt var nú rétt í þessu á facebook síðu Striksins, sem að Heba Finnsdóttir, eigandi veitingahússins Striksins og Bryggjunnar á Akureyri skrifar.

Atvikið er hægt að horfa á í fréttatíma RÚV (8:25) með því að smella hér.

Mynd: skjáskot úr fréttatíma RÚV

/Smári