Sviptingar í veitingabransanum

Síðastliðna daga og vikur hafa verið nokkuð um sviptingar í veitingabransanum, þar sem veitingastaðir hafa hætt, eigendaskipti og fleira.

Jómfrúin og Fjárhúsið

Nokkrar hræringar hafa orðið hjá Hlemmi mathöll, en nú á dögunum hætti Jómfrúin rekstri þar og ætlar sér að einbeita sér að rekstrinum í Lækjargötu.

„Rekstur okkar á Hlemmi hefur verið töluvert þungur og var það eiginlega allt síðasta ár þó að árið í ár hafi verið betra.“

Sagði Jakob E. Jakobsson, framkvæmdastjóri og annar eigandi Jómfrúarinnar, í samtali við mbl.is.

Jómfrúin seldi aðstöðu og leigusamning sinn á Hlemmi til skyndibitastaðarins Fjárhúsið.

Herborg Svana Hjelm og Birgir Rafn Reynisson eigendur Fjárhússins hefja rekstur á Hlemmi í dag og er þetta fimmti staðurinn sem þau opna undir merkjum Fjárhússins.

Í samtali við Matarvef mbl.is staðfesti Birgir að þau hefðu tekið plássið og að planið væri að opna splunkunýjan stað sem yrði í hollari kantinum.

Rabbar barinn lokar

Veitingastaðurinn Rabbar barinn á Hlemmi verður lokað. Eigandi staðarins segir ástæðuna einfalda:

„Það er bara ekki nógu mikið að gera,“

segir Böðvar Lemax, eigandi Rabbar barsins í samtali við visir.is.

Solla selur Birgi Gló

Hjónin Sólveig Eiríksdóttir og Elías Guðmundsson hafa selt hjónunum Birgi Bieltvedt og Eygló Björk Kjartansdóttur 30 prósenta hlut sinn í veitingastaðakeðjunni Gló.

Elías segir að samið hafi verið um það árið 2017 þegar ákveðið var að veitingastaðurinn færi í útrás til Danmerkur að Birgir og Eygló Björk myndu kaupa þau hægt og rólega út.

„Við höfum verið á hlaupum lengi og kominn tími til að slaka á. Félagið er komið i ágætis horf og tækifæri er fyrir nýja aðila til að taka fyrirtækið á næsta stig,“

segir hann í samtali við Markaðinn hjá visir.is.

Bragginn í Nauthólsvík lokar – Nýir rekstaraðilar taka við

Stefnt er að enduropnun hins umtalaða Bragga í Nauthólsvík í næstu viku. Veitingastaður Braggans hefur verið lokaður undanfarnar vikur, eftir að rekstraraðilar Braggans Bar & Bistro sögðu samningi sínum lausum í vor, að því er fram kemur á visir.is.

Í tilkynningu frá Háskólanum í Reykjavík segir að NH100 ehf. hefur tekið við veitingarekstri í Bragganum, en fyrri rekstraraðili, Víkin veitingar ehf., sagði upp samningi um rekstur Braggans í vor. Nýir rekstraraðilar hyggjast leggja aukna áherslu á að Bragginn verði félagsaðstaða fyrir nemendur HR og munu eiga náið samstarf við Stúdentafélag HR og bjóða upp á fjölbreytta viðburði í samstarfi við nemendur.

NH100 ehf. er í eigu sömu aðila og hafa séð um rekstur á Nauthóli og matsölunni Málinu í háskólanum, en HR hefur átt í farsælu samstarfi við þau undanfarin ár. Reiknað er með að Bragginn opni að nýju eftir rúma viku.

Nýr veitingastaður í Mathöll Höfða

Veitingastaðurinn Möns er nýr veitingastaður í Mathöll Höfða. Staðurinn býður upp á hádegishlaðborð alla daga.

Bæjarins Beztu hætt á Akureyri

Bæjarins Beztu opnaði sinn fyrsta pylsuvagn á Akureyri í byrjun sumars sem nú er búið að loka.

„Það er leiðinlegt að sjá að það sé ekki markaður fyrir svona vinsælum rétti eins og Bæjarins Beztu pylsum á Akureyri. Við erum þó ennþá opin fyrir því að bjóða upp á Bæjarins Beztu pylsur á Akureyri og hver veit hvort að við byrjum á því aftur einhvern tímann á næstunni,“

segir Barði Þór Jónsson, einn rekstraraðila vagnsins á Akureyri í samtali við kaffid.is.

Guðrún Björk Kristmundsdóttir, eigandi Bæjarins beztu segir í samtali við visir.is, aðspurð hvort ekki hafi verið hægt að selja Akureyringum pylsur:

„Jú, algjörlega. Við erum ekkert að kvarta yfir því en við ákváðum bara af því að nú er að koma vetur að við ætlum að taka okkur pásu í vetur og svo sjáum við til næsta vor,“

Nýtt hótel – Six Senses Össurá Valley

Hótelið sem Jakob Frímann Magnússon, tónlistar- og athafnamaður, og Áslaug Magnúsdóttir, athafnakona í New York, eru í forsvari fyrir hluti af Six Senses hótelkeðjunni. Fjallað er um hótelið á vef Hospitality Net sem að mbl.is vekur athygli á, en þar sem kemur fram að hótelið opnar árið 2022 og mun bera nafnið Six Senses Össurá Valley og er staðsett í landi Svínhóla í Össurárdal, rétt norðan við Höfn í Hornafirði.

Mynd: úr safni