Kórdrengirnir í Súkkat

Kórdrengirnir í Súkkat

Upptökur standa yfir hjá Sjónvarpinu á þáttaröðinni Söngvaskáld og ætlar dúettinn Súkkat að flytja vel valin lög af ferli sínum.

Tónleikarnir verða í dag miðvikudaginn 30 maí, klukkan 15;20 og þér er boðið að kíkja á félagana í Efstaleiti 1. Tónleikarnir standa yfir í um klukkustund.

Kórdrengirnir í Súkkat, þeir Hafþór Ólafsson og Gunnar Örn Jónsson eru vel kunnugir veitingabransanum, en þeir eru matreiðslumenn að mennt og vinna á hinum geysivinsæla veitingastað Við Tjörnina. Það eru þau Gunnar Örn og Sigríður Auðunsdóttir sem sjá um rekstur veitingastaðarins Við Tjörnina.

Hafþór og Gunnar hafa spilað saman í nær 20 ár og eiga fjölmörg góð lög, eins hafa þeir verið í samfloti með Megas í 10 ár og haldið tónleika einu sinni á ári sem ber heitið Megasukk.

Freisting.is hafði samband við Gunnar og spurðist fyrir um nafnið Súkkat og því var fljót svarað: á Akureyri voru þau börn sem urðu útundan kölluð „Súkkat“.

Endilega kíkið á félagana í dag upp á Efstaleiti.

Glæbörkur
Mynd: úr safni

Og á kokkamáli þýðir súkkat:

Skrápsítrónan er skorin í sundur, aldinkjötið fjarlægt og börkurinn látinn liggja í pækli í 40 daga eða svo. Síðan er hann soðinn, sykraður og þurrkaður og er þá orðinn að súkkati. Súkkat er aðallega notað í kökur og sælgæti. Úr safameiri afbrigðum skrápsítrónu er einnig hægt að nýta safann. Skrápsítrónan gegnir líka veigamiklu hlutverki í uppskeruhátíð Gyðinga, sukkot.Skrápsítróna heitir á ensku citron, á dönsku cedrat, á sænsku sötcitron, á frönsku cédrat og á þýsku Zedrate.

Venjuleg sítróna heitir hins vegar lemon á ensku. Súkkat kallast candied peel eða candied citron á ensku, á dönsku sukat og sænsku suckat, á frönsku cédrat og á þýsku Zitronat.

Heimild: Vísindavefurinn