Kaffivagninn skiptir um eigendur

Hjónin Guðmundur Viðarsson og Mjöll Daníelsdóttir sem rekið hafa Kaffivagninn sl. þrjú og hálft ár hafa selt reksturinn ásamt fasteign til FoodCo hf.  Kaffivagninn á sér langa og farsæla sögu og er elsti starfandi veitingastaður landsins en hann var stofnaður árið 1935 og var í upphafi vörubíll með yfirbyggðum palli sem stóð á Ellingsenplaninu sem var á horni Pósthússtrætis og Tryggvagötu.

Kaffivagninn á Granda hefur verið starfræktur síðan árið 1935 og ávallt notið mikilla vinsælda

Í byrjun sjötta áratugarins fluttist Kaffivagninn svo vestur á Grandagarð í formi lítils húss á steinhjólum sem tók 10-15 gesti í sæti.  Á þessum árum var Reykjavík stærsta verstöð landsins og opnaði Kaffivagninn eldsnemma á morgnana og nestaði trillukarla ásamt því að ylja sjómönnum og hafnarverkamönnum með rjúkandi kaffi og bakkelsi.

Guðmundur Viðarsson, Mjöll Daníelsdóttir og breski sjónvarpskokkurinn Ainsley Harriott en hann var gestakokkur Kaffivagnsins í einu hádeginu þar í lok febrúar árið 2014

Hús Kaffivagnsins hefur verið í núverandi mynd frá því 1975 og síðsumar 2014 var byggður glæsilegur útipallur við austurgafl hússins með útsýni yfir höfnina og Hörpu.

Í fréttatilkynningu frá Foodco segir að rekstri Kaffivagnsins verður haldið áfram með óbreyttu sniði og lögð verður áhersla á að varðveita þá sögu og þann sjarma sem fylgt hefur staðnum í gegnum árin.

Myndir: kaffivagninn.is