Harry tekur við rekstri Nauthóls – Tómas og Sigrún kveðja eftir níu dásamleg ár

Haraldur Halldórsson framreiðslumeistari, betur þekktur sem Harry

Haraldur Halldórsson framreiðslumeistari, betur þekktur sem Harry, hefur tekið við rekstri veitingastaðarins Nauthóls í Reykjavík.  Með honum í verkefninu er góður vinur hans, og saman munu þeir stýra þessum rómaða veitingastað ásamt veislusalnum sem tilheyrir honum.  Jafnframt hefur Harry tekið yfir rekstur á Málinu, mötuneytinu í Háskólanum í Reykjavík.

Í tilkynningu frá Harry kemur fram að hann hlakki til nýrra tíma og spennandi verkefna – þó hann búist ekki við miklu fríi næstu misserin. Hann biður vini og vandamenn um að kíkja við – en með léttu gríni bendir hann á að þeir verði þó að greiða „vesen gjald“ upp á 25% hærra verð fyrir að vera í vinahópnum.

Sigrún Guðmundsdóttir og Tómas Kristjánsson

Á sama tíma kveðja núverandi rekstraraðilar, þau Tómas Kristjánsson og Sigrún Guðmundsdóttir, eftir níu ár við stjórnvölinn. Í hlýlegri kveðju segja þau það hafa verið gæfu sína að fá að vinna með frábæru starfsfólki og þjónusta ótal skemmtilega gesti, bæði á Nauthóli og Málinu. Þau lýsa þakklæti, hlýju og tilhlökkun fyrir næsta kafla í lífinu – og eru sannfærð um að leiðir allra muni mætast á ný, fyrr en síðar.

Við á Veitingageiranum óskum Harry velfarnaðar í nýju hlutverki og Tómasi og Sigrúnu innilega fyrir þeirra mikilvæga framlag til matarflórunnar á Íslandi.

Myndir: úr safni