Vínmiðinn

Miðar á vínflöskum eru mjög misjafnir að lögun og útliti og getur það vafist fyrir mörgum hvaða upplýsingar það eru sem fram koma á honum.
Þær upplýsingar sem oftast koma fram á vínmiða eru sem dæmi, alkohól innihald, stærð flösku, upplýsingar um framleiðanda, hvaðan vínið kemur og oftar en ekki er ártal á miðanum eða tengdum miða sem er á háls vínflöskunnar.

Neytendum vína er nauðsynlegt að kunna að lesa helstu staðreyndir út úr vínmiða hverju sinni og ekki má gleyma því að kynna sér vel þau vín sem borin eru fyrir gesti veitingahúsa. Margir gestir veitingahúsa panta sér vín með þeim mat sem pantaður er.
Framreiðslumaðurinn kemur með vínflösku og réttir hana að þeim sem pantaði. Hvert er þá hlutverk gestsins, hvað á hann að gera? Við þessar aðstæður er ætlast til þess að gesturinn lesi miðann. Framreiðslumaðurinn er að fá gestinn til að samþykkja það vín sem hann er að sýna. Væntanlega er þetta vín sem gestur veitingastaðarins hefur pantað og er framreiðslumaðurinn að tryggja það með kynningu á víninu að um rétt vín sé að ræða.

Vínmiðar eru mjög margvíslegir og er nauðsynlegt fyrir fólk að athuga hvort rétt vín sé afgreitt og að vínið sé af réttum árgangi. Nauðsynlegt er að leggja nafn víns á minnið frekar en að muna hvernig flaskan lítur út ef einstaklingur vill drekka viðkomandi vín aftur.

Hér eru leiðbeiningar um það hvernig lesa á vínmiða.
1. Nafn vínsins oftar en ekki sama nafn og er á víngerðarhúsinu (Châteauinu).
2. Listaverk eða merki víngerðarhússins.
3. Nafn vínsins.
4. Nafn víngerðarsvæðis (héraðs) eða þorps sem vínið er kennt við.
5. Gæðamerking vínsins. Oftar en ekki er gæðastimplun háð opinberri stjórnun (lögum).
6. Árgangur vínsins.
7. Magn víns í flöskunni og upplýsingar um alkohól innihald.
8. Upplýsingar um þann sem tappar víninu á flöskur. Í þessu tilfelli er það framleiðandinn.

Höfundur:
Baldur HP Sæmundsson

Heimild:
SKG.is