Hafnfirskur mafíustaður undir tælenskum áhrifum

Veitingastaðurinn Badabing hefur verið opnaður í Hafnarfirði. Nafn staðarins er mörgum kunnuglegt enda ber strippbúllan sem mafíufélagarnir úr Sopranos-þáttunum sækja reglulega sama nafn.

„Nafnið er vissulega fengið úr sjónvarpsþáttunum og lógó staðarins er fengið úr myndunum um Guðföðurinn,“ segir Sturla Jensson, rekstrarstjóri Badabing í samtali við Fréttablaðið.

Staðurinn stendur við Flatahraun, beint á móti Kaplakrika, heimavelli FH. „Stuðningsmannalið FH í fótboltanum kallar sig Mafíuna og þannig varð tengingin við Sopranos og Guðföðurinn til,“ útskýrir Sturla sem á þó ekki heiðurinn af nafninu heldur Árni Björn Árnason, eigandi Badabing.

Þótt nafn staðarins hafi tengingu mafíuna er ekki að finna hefðbundnar ítalskar kjötböllur að hætti mafíunnar heldur tælenskan mat. „Við opnuðum sama dag og heimsmeistaramótið í fótbola byrjaði, þann 9. júní, og það hefur verið mikið að gera síðan þá,“ segir Sturla en auk tælensku réttanna býður Badabing upp á pizzur, fisk- og ísrétti og grill. Þá geta gestirnir einnig fylgst með fótboltaleikjum á risatjaldi.

Sturla rekstarstjóri segir það ekki á dagskrá að breyta hinum hafnfirska Badabing í strippbúllu eins og fyrirmyndin í Sopranos. „Nei, það kemur ekki til greina.“

Greint frá á visir.is

[email protected]