Villigæsaborgarinn á Fabrikkunni

Þeir kalla hann Heiðar og er þetta 4 árið sem þeir bjóða upp á hann, ég smakkaði hann fyrst 2012 eins og þið getið lesið með því að smella hér og lék mér forvitni á hvort eitthvað hefði breyst.

Svo einn daginn skellti ég mér þar inn og pantaði Heiðar og bað um að fá gráðostasósu með, minnugur þess fyrir 2 árum er ég fékk tómatsósu með.

Svo kom borgarinn á borðið og það fyrsta sem ég tók eftir var að framsetningin á honum var nánast eins og fyrir 2 árum og tel ég það merki um að stöðugleiki í eldhúsinu sé í góðu jafnvægi.

Hamborgarinn var mjög góður á bragðið og maður fann fyrir fínu kjöti, sætu perunni, bláberjasultunni, rjómaostinum og fabrikkusósunni og gráðostasósan upp á móti sætu kartöflunum. Allt small þetta vel saman, eina sem mér fannst ofaukið var fabrikkusósan og myndi ég mæla með að sleppa henni, en í staðinn myndu þeir fabrikkubræður hafa samband við Úlfar Finnbjörnsson villibráðar sérfræðing og fá hann til að búa til kalda villibráðarsósu, sem hægt væri að setja á borgarann til að magna upp villibragðið, sem er eiginlega það sem vantar til að gera þennan rétt sannarlega villibráðarskyndibiti.