Málþing KBFÍ 2014: Undirbúningur kominn á fullan skrið

Pálmar Þór Hlöðversson

Undirbúningur fyrir árlegt málþing Kaffibarþjónafélags Íslands er komið á skrið. Verður málþingið, sem ber undirtitilinn „Kaffi og aðrar lystisemdir“, haldið í Hörpu báða dagana sem Kaffihátíðin stendur yfir 21. og 22. febrúar nk. Viðburðurinn verður með öðru sniði en fyrri ár, en takmarkaður sætafjöldi verður í boði, að því er fram kemur á vef KBFÍ.

Þegar hafa nokkrir fyrirlesarar verið staðfestir: Ólafur Örn Ólafsson, vínspekúlant með meiru; Eirný Sigurðardóttir, Slow Food frömuður og eigandi sælkeraverslunarinnar Búrið og Omnom Chocolate-teymið verður með fræðslu um súkkulaðigerð. Einnig hafa kaffibarþjónarnir Pálmar Þór Hlöðversson og Tumi Ferrer, sem báðir hafa hlotið titilinn Íslandsmeistari kaffibarþjóna, verið staðfestir.

Málþingið verður hið þriðja á jafnmörgum árum sem KBFÍ stendur fyrir eða tekur þátt í.  Fyrsta málþingið, „Hinir ólíku vegir til kaffibollans“ var haldið árið 2012 af Hrönn Snæbjörnsdóttur, þá meistaranema í hagnýtri menningarmiðlun við HÍ, en hún hefur einnig bakgrunn sem kaffibarþjónn og meðlimur í stjórn KBFÍ.

Upplýsingar um skráningu og miðaverð liggja fyrir á næstu dögum en nánari upplýsingar er hægt að lesa á vef KBFÍ hér.

Mynd: kaffibarthjonafelag.is

/Smári