Bættu smá bragði af New York í lífið þitt – „..það verður erfitt að toppa þetta kvöld“

Við fengum boð á New York daga á Vox restaurant sem standa yfir um þessar mundir hjá þeim alveg fram á sunnudag. Þar hafa þeir fengið til sín tvo mjög hæfa matreiðslumenn til að töfra fram mjög skemmtilegan matseðil sem hefur allt það besta sem New York hefur upp á að bjóða matarlega séð. Þessir kokkar heita Michael Ginor og Douglas Rodriguez.

Þess má geta að á næstu mánuðum verður boðið upp á svona uppákomur hjá þeim á Vox, það er að segja að fá gestakokka frá einhverjum af þeim áfangastöðum sem Iceland Air flýgur til. Ég hlakka mikið til að sjá hverskonar flugeldasýningar verður boðið upp á.

Kvöldið byrjaði á tveimur hanastélum sem þeir félagar höfðu átt hugmyndir af og voru það:

Báðir voru mjög áhugaverðir og framandi drykkir og brögðuðust hreint frábærlega og sérstaklega þá Mojitoinn, einnig var reykti ananasinn mjög skemmtilegur snúningur.

Því næst tók við 5 rétta veisla sem hljóðaði upp á:

Foie Gras
Torchan Hudson Valley foie gras með rauðrófum og rabarbara

Yndisleg áferð á andalifrinni, ávaxtabrauð ofan á mjög gott. Alls ekki of þungur réttur. Fengum Pino Gris með þessum rétti sem smellpassaði með.

Ceviche
Bleikja og vatnsmelóna
“Choros ala chalaca” kræklingur með maís og tómötum
Skarkoli, sellerí, grape og fáfnisgras
Ostra og ígulkerja ís
Thailenskt sjávarrétta chevice, kókosmjólkur calamari
Leturhumar að hætti Ekvador með avocado

Heill heimur af allskonar brögðum. Frábær bragðsamsetning og hver réttur öðrum skemmtilegri. Gaman að smakka ígulkerjaís en myndi ekki borða mikið af honum. Unun að njóta. Mæli með því að fólk borði með guðs göfflunum til að njóta þessa réttar til fullnustu.

Andar-vefjur á þrjá vegu
Andabringa með chipotle majónesi og bláum maís
Andarconfit með sætri kartöflu og steiktu eggi
Foie gras með léttsteiktu hvítkáli, andarskinku og maís

Þrælskemmtileg útfærsla á götumat, sérstaklega var andalifrin aftur alveg hreint frábær. Bjórinn sem er sérbruggaður fyrir Vox frá Gæðing var fullkominn með þessum margslungna rétti.

Klassískt New York steikhús

Vá!!! Hvar á ég að byrja. Þessi réttur er með þeim betri steikum sem ég hef smakkað. Ísbúinn í spínatinu kom mjög skemmtilega í gegn og sýran í lauknum gerði kraftaverk. Flanið var guðdómlegt.

Torrejas
Spænskt “ french toast” reykt döðlusósa og möndluís

Þessi réttur var mjög góður og fullkominn endir á frábæru kvöldi, sérstaklega skemmtileg reykta döðlusósan.

Á heildina litið var þetta frábær matur og eina sem ég hefði getað sett út á var stærðin á skömtunum því við rúlluðum alveg hreint út. Finnst mér þetta frábært framtak hjá Icelandair og Vox og lífgar þetta upp á matarflóruna. Eins og ég sagði í upphafi þá hlakka ég verulega til að sjá hvaða galdramenn þeir fljúga með hingað í næsta mánuði, en það verður erfitt að toppa þennan matseðil.

Gengum við sælir og glaðir út í nóttina með bros á vör.

Myndir: Axel

Texti: Hinrik

Taggaðu okkur á Instagram: #veitingageirinn og myndirnar birtast sjálfkrafa á forsíðunni.