Veitingastaðnum á Hótel Holti lokað

Veitingastaðnum Holt á Hótel Holti var lokað í gær eftir rúmlega hálfs árs rekstur í höndum nýrra rekstraraðila. Samkvæmt upplýsingum frá Hótel Holti er óvíst hvenær hann verður opnaður aftur, að því er fram kemur á vefnum frettabladid.is.

Eins og fram hefur komið þá gerðu eigendur DILL Restaurant, KEX hostels og Hótel Holts samkomulag um veitingarekstrur á Hótel Holti um áramótin s.l.

Ragnar Eiríksson, sem var yfirkokkur á DILL, varð yfirkokkur á Holtinu. Ragnar átti að nýta reynslu sína frá rekstri DILL Restaurant, Henne Kirkeby Kro, The Paul, Noma og víðar til að skapa nýtt andrúmsloft á Holtinu sem byggir þó á gömlum og klassískum grunni Hótel Holts.

Hótel Holt var opnað upphaflega árið 1965 og hefur alla tíð verið í eigu sömu fjölskyldunnar en er í dag rekið af dóttur stofnendanna, Geirlaugu Þorvaldsdóttur.

Geirlaug segir í samtali við Vísi að hún geti lítið tjáð sig um það hvers vegna veitingastaðnum var lokað í gær.

„Við björgum okkur, við erum vön að gera það og þetta fer allt vel að lokum,“

segir Geirlaug .

Mynd: holt.is