Nýr bar í 101 Reykjavík | Klaustur Downtown Bar

Um helgina opnar nýr bar í 101 Reykjavík.  Það er Klaustur Downtown Bar í sama húsnæði og Vínbarinn Bistro var til húsa á Kirkjuhvoli fyrir aftan Dómkirkjuna og Alþingi.

Húsnæðið hefur staðið autt síðan að Vínbarnum lokaði í apríl síðastliðnum en nýi barinn verður í svipuðum dúr með afbragðsvín og vinalega stemningu í húsinu ásamt góðum bjór á krana með Einstök fremst í flokki. Reksturinn er í höndum hótelsins í sama húsi, Kvosin Downtown Hotel. Hótelið opnaði í fyrra og hefur slegið í gegn hjá ferðalöngum sem eru að leita eftir að gera vel við sig.

Iðunn Ásgeirsdóttir yfirbarþjónn í óða önn að gera allt klárt fyrir opnunina

Hótelið hefur verið vinsælla en bjartsýnustu menn þorðu að vona en það hefur tilfinnanlega vantað bar í húsið síðan Vínbarinn lokaði. Ekki bara fyrir hótelgesti því það koma ennþá leigubílar um hverja helgi með fólk sem heldur að Vínbarinn sé enn opinn og það hefur í raun enginn staður tekið við af honum eftir lokun

, segir Snorri Valsson, hótelstjóri.

Það lá því beinast við að opna aftur á svipuðum nótum en með smá breyttum áherslum

, heldur Snorri áfram.

Mikið er búið að spá og spekúlera í vínvali og ættu allir að finna eitthvað fyrir sinn smekk, hvort sem um ræðir vínglös eða flöskur. Stemningin á að vera afslöppuð og vinaleg og verð miðað við gæði ætti að koma gestum barsins þægilega á óvart.

Til að byrja með verður opið frá 16:00 alla daga vikunnar þar til í kringum miðnætti. Eldhús verður ekki starfrækt á barnum til að byrja með en það hefur allt verið innréttað og gert er ráð fyrir að fyrr en síðar verði matur í boði en það mun ráðast snemma á næsta ári með hvaða hætti.

Myndir: af facebook síðu Klaustur Downtown Bar.

/Smári