Negroni vika á vegum Campari haldin víðsvegar um heiminn | MAR BAR styrkir neyðaraðgerðir UNICEF eftir hörmungarnar í Nepal

Þessa dagana tekur MAR BAR þátt í alþjóðlegu átaki á vegum Campari sem nefnist „Negroni Week“ en flestir yfir þrítugt hið minnsta ættu að þekkja þennan klassíska kokkteil Negroni, en uppistaða hans er Campari.

Negroni vikunni var hleypt af stokkunum árið 2013 af tímaritinu Imbibe ásamt Campari til heiðurs eins af þekktustu kokkteilum heims og þeirri viðleitni til að afla fjár til góðgerðamála. Frá 2013 til 2014 stækkaði Negroni vikan ótrúlega, eða frá 100 þátttakendum árið 2013 og upp í meira en 1300 bari sem tóku þátt um allan heim ári síðar og meira en kr 16.000.000.- söfnuðust til hinna ýmsu góðgerðarmála.

Árið 2015 er Negroni vikan haldin frá 1. til 7.júní, og munu barþjónarnir á MAR BAR ásamt fjöldanum öllum af barþjónum víðsvegar um heiminn blanda sinn uppáhalds Negroni og gefa hluta af ágóðanum af hverjum seldum Negroni til góðgerðamála að eigin vali. MAR BAR hefur valið að styrkja neyðaraðgerðir UNICEF eftir hörmungarnar í Nepal og mun því kr 500.- af hverjum seldum Negroni á MAR BAR til og með 7. júní renna til þessa verkefnis.

Á laugardagskvöldið 6.júní nær söfnunin á MAR BAR svo hámarki þar sem sérstakt tilboð á Negroni verður í gangi allt kvöldið. Starfsfólk MAR BAR og Campari á Íslandi vilja hvetja alla til að koma og fá sér góðan drykk en síðast en alls ekki síst, að láta gott af sér leiða.