Mathöllin Vera lokar

Vera mathöll lokar tímabundið frá 1. júlí, að því er segir í stuttri tilkynningu á facebook síðu Veru.

Mathöllin opnaði 5. ágúst í fyrra og er staðsett í húsinu Grósku í hjarta Vatnsmýrarinnar í Reykjavík.

Sjá einnig: Mathöllin VERA opnar í Vatnsmýri

Í Veru voru átta veitingastaðir og fimm þeirra var lokað áður en ákvörðun um að loka mathöllinni var tekin, að því er fram kemur á visir.is.

Staðirnir átta voru Pünk Fried Chicken, pizzastaðurinn Natalía og vínbarinn og kaffihúsið Mikki Refur, mexíkóski staðurinn Caliente, Bang Bang, súpustaðurinn Næra, morgunverðarstaðurinn Stund og loks Fura í eigu verðlaunakokksins Denis Grbic.

Veitingastaðurinn Stund birti eftirfarandi tilkynningu á Instagram í gær:

„Vera Mathöll lokar 1. júlí og ófyrirséð er hvenær opnað verður aftur. Af þeim sökum sjáum við okkur því ekki fært á að halda starfsemi okkar gangandi í ljósi þeirrar óvissu sem við blasir og höfum við ákveðið að leita á önnur mið.“

Vera mathöll endar tilkynningu sinni með því að segja „Hlökkum til að taka á móti ykkur að nýju eftir breytingar.“

Hægt er að lesa fleiri fréttir um Veru hér.