114 herbergja hótel á Húsavík

Framkvæmdir við stækkun á Fosshótel Húsavík eru hafnar og áætlað er að þeim ljúki eftir áramótin 2016.  Miklar breytingar standa til, en herbergjum á hótelinu fjölgar um 44 og verða 114 eftir stækkun.

Jafnframt verða þrír nýir fundarsalir í kjallara hótelsins ásamt veitingaaðstöðu.  Þá mun móttaka taka miklum breytingum auk þess sem eldri herbergi verða endurbætt.  Fosshótel hafa rekið hótel á Húsavík um árabil og hafa miklar endurbætur verið gerðar á hótelinu síðustu misseri.

Hótelið verður allt hið glæsilegasta, en mikill uppgangur hefur verið í ferðaþjónustu á Húsavík og nágrenni á undanförnum árum og því tímabært að fara af stað með þessa framkvæmd.

Fosshótel er keðja hótela hringinn í kring um landið og er hluti af Íslandshótelum.  Fosshótelin eru í dag 10 talsins en mun fjölga um eitt næsta sumar þegar Fosshótel Reykjavík á Höfðatorgi opnar. Fosshótel Reykjavík verður stærsta hótel landsins, first class hótel með 320 herbergjum.

Tölvuteiknaðar myndir: aðsendar

/Smári