Snæddi íslenskan fjallaref

Það er ekki á hverjum degi sem villtur íslenskur fjallarefur er snæddur á Íslandi enda seint talinn hefðbundinn íslenskur heimilismatur.

Súgfirðingurinn og veiðimaðurinn Jón Vigfús Guðjónsson tók sig til og eldaði refapottrétt um jólin en það hefur blundað lengi í honum að prófa að borða alvöru villtan íslenskan ref. „Ég bað vin minn Vigni Stefánsson að hafa mig í huga næst þegar hann felldi ref því mig langaði til að smakka hann. En það tók smá tíma að sannfæra hann um að ég væri ekki að grínast. En svo hringdi hann í mig þegar hann hafði fellt ref í Skagafirði og ég skellti mér strax á staðinn og verkaði refinn sem var á fyrsta ári og virkaði heldur rýr að sjá.

Mér fannst ég vera að flá hund svo ég frysti kvikyndið í 10 daga til að safna í mig meiri kjarki til að snæða hann. En svo rann upp góður dagur og ég tálgaði kjötið af ganglimum refsins sem var ekki mikið þegar upp var staðið“, segir Jón Vigfús við bloggvef Suðureyrar.

Refurinn var steiktur á pönnu og smakkaðist vel að sögn Jóns. „Fyrsti bitinn fór frekar hægt upp í munninn því ég vissi ekkert hverju ég átti von á. En viti menn, bragðið minnti einna helst á kindagúllas. Þetta kom mér verulega á óvart og það er óhætt að mæla með íslenska refnum á matarboðið sem kreppusteik,“ segir Jón á Suðureyrarvefnum.

Jón segist vel vera til í að borða fleiri refi í framtíðinni séu þeir verkaðir strax. „Ef ég myndi bjóða gestum í refasteik, þá þyrfti ég eitt kvikyndi á mann en það fer eftir meðlætinu að sjálfsögðu,“ sagði Jón við Súgfirðingavefinn en er þar varpað fram þeirri spurningu hvort íslenski refurinn skyldi vera næsta villibráðin sem boðið verður uppá á fínustu veitingarhúsum landsins.

Mynd og Texti af Vestfirska vefnum bb.is