Mjólka flytur í Hafnarfjörð

Mjólka hefur fest kaup á matvælafyrirtækinu Vogabæ og hefur mjólkurstöð Mjólku verið flutt í verksmiðjuhúsnæði Vogabæjar við Eyrartröð 2a í Hafnarfirði. Vogabær og Mjólka munu halda áfram að framleiða undir eigin merkjum.

Í tilkynningu segir að kaupin á Vogabæ fela í sér umtalsverð samlegðaráhrif í framleiðslu og dreifingu á afurðum beggja fyrirtækja.

Vogabær framleiðir sósur og ídýfur og selur framleiðslu sína undir merkjum Vogabæjar og E. Finnsson. Fráfarandi eigendur og stjórnendur Vogabæjar munu starfa áfram hjá fyrirtækinu.

„Auk þeirra augljósu samlegðaráhrifa sem felast í að sameina dreifingu, skrifstofuhald og stjórnun þessara tveggja fyrirtækja þá leysum við um leið mjög brýnan húsnæðisvanda sem hefur verið að há eðlilegum vexti Mjólku undanfarna mánuði. Mjólkurstöðin rúmast vel í verksmiðjuhúsnæði Vogabæjar án þess að þrengt verði um of að þeirri starfsemi sem fyrir er,“ segir Ólafur M. Magnússon framkvæmdastjóri Mjólku í fréttatilkynningu.

Stefnt er að því að ljúka flutningi mjólkurstöðvar Mjólku í Hafnarfjörð á næstu vikum. Samhliða kaupunum á Vogabær er lokið fjárhagslegri endurskipulagningu á Mjólku.

Fyrirtækið Mjólka ehf. var stofnað í febrúar árið 2005 af fjölskyldunni að Eyjum II í Kjós og aðilum henni tengdum. Síðar gerðist Vífilfell hluthafi í fyrirtækinu. Mjólka rekur  mjólkurframleiðslu í eigin búi að Eyjum II í Kjós og einnig mjólkurstöð sem sérhæfir sig í framleiðslu á ostum og öðrum mjólkurafurðum fyrir innanlandsmarkað.

Texti frá: Mbl.is | [email protected]