Eldum rétt kvartar yfir nafni Eldum strax

Lögfræðingur Eldum rétt hefur sent Eldum strax kvörtunarbréf þar sem þeir gera Eldum strax að sök að hafa brotið á vörumerkjaréttindum í eigu Eldum rétt ehf. og lögum um eftirlit með viðskiptaháttum og markaðssetningu, að því er fram kemur á ruv.is.

Krafa er gerð um að Heimkaup hætti án tafar að nota auðkennið Eldum strax. Bréf sama efnis hefur einnig verið sent á framkvæmdastjóra Einn, tveir og elda ehf. Öll fyrirtækin bjóða upp á sams konar þjónustu, sala á tilbúnum matarpökkum ætluðum til eldunar heima.

Guðmundur Magnússon, framkvæmdastjóri Heimkaupa og Eldum strax, segir í samtali við fréttastofu ruv.is að hann telji að rétturinn sé þeirra megin og að erfitt verði fyrir Eldum rétt að fá þetta í gegn.

„Það er ekki hægt að halda því fram að „elda“ megi ekki koma fyrir í neinu núna sérstaklega þegar það er verið að bjóða þjónustu sem snýr að því að elda,“

segir Guðmundur í samtali við ruv.is sem fjallar nánar um málið hér.

Mynd: úr safni