Bergsson RE opnar á Granda

Bergsson RE er í húsi Sjávarklasans að Grandagarði 16.

Það eru orðnar all margar vikur síðan að veitingahúsið Bergsson RE var tilbúið til opnunar. Vegna verkfallsaðgerða var það hins vegar ekki fyrr en í gær sem að tókst að ganga frá öllum tilskyldum leyfum og hefja reksturinn formlega. Klukkan ellefu var keyrt í gang og í hádeginu var nær fullsetið á staðnum, að því er fram kemur á vinotek.is.

Það er Bergsson Mathús í Templarasundi sem er móðurstöð Bergsson RE en í eldhúsinu í Húsi sjávarklasans á Granda er það Ólafur Örn Ólafsson sem ræður ríkjum. Hann segir að staðurinn verði opinn í hádeginu alla virka daga, þá verði kaffiveitingar fram eftir degi og staðurinn muni einnig bjóða upp á “happy hour” á barnum fram til klukkan sex.

“Eftir það verður fólk að flytja sig annað, t.d. á Slippbarinn, að minnsta kosti fyrst um sinn,”

segir Ólafur í samtali við vinotek.is.

Mynd: Smári