Argentína Steikhús – Veitingarýni

Veitingahúsið Argentína er 25 ára og við félagarnir ákváðum að skreppa þangað og smakka þennan afmælisseðil.

Í gegnum árin þá hefur Argentína þótt bera af í steikum og verið hátt skrifaður veitingastaður í augum margra.

En hér kemur maturinn eins og hann var borinn á borð fyrir okkur:

Smakk
Gæsalifraterrine með bökuðum gulrótum og snjó

Við höfum ekki smakkað svona gott terrine í mörg ár, algjört sælgæti.

Pönnusteiktur humar
Með smjörsteiktum Portobellosveppum og þurrkaðri Serrano skinku

Alveg svakalega góður humar, sveppurinn og maukið frábært, en skinkan stal svolítið bragði, spurning að hafa minna.

Laxatartar og reyklaxafrauð

Mjög bragðgóður réttur, í mildari kantinum

Grafin heiðagæsabringa
Með fersku klettasalati, þurrkuðum hindberjum, ristuðum furuhnetum og rauðrófum

Þessi réttur var algjört æði, eitt orð vá.

Appelsínusorbet

Mjög gott bragð, ekki of sætur og virkilega ferskur

Grilluð nautalund
Með pönnusteiktri andalifur, karamelluðum perlulauk, djúpsteiktum blaðlauk, kartöflugratini og Madeira bættum soðgljáa

Úps, hvað var nú að gerast, steikin var seig, grófir þræðir í henni, meðlæti myndi passa betur með pylsu, hvernig gat þessi réttur komið úr sama eldhúsi og þeir sem komið höfðu á undan?

Tapas Pavlova með vanillu marquise og rabarbarasósu
Ásamt volgri súkkulaðiköku og vanilluís

Dásemdin ein.

Þegar þetta er skrifað er ég enn að reyna að átta mig á hvað hafi gerst með steikina og hef ekki fundið ásættanlega útskýringu á því.

Þjónustan var til fyrirmyndar og staðurinn býður af sér svona rómatískan þokka og allt gekk eins í sögu, nema blessuð steikin.

/Sverrir