Lánuðu forstjóranum 500 milljónir án trygginga

Atorka lánaði forstjóra A. Karlssonar 510 milljónir án trygginga í lok árs 2007 til að kaupa 51% hlut Atorku í fyrirtækinu. Viðskiptin voru ekki tilkynnt til Kauphallarinnar. Atorka er núna í nauðasamningum og ljóst að kröfuhafar og hluthafar verða fyrir miklu tjóni, en frá þessu er greint frá á vef Morgunblaðsins mbl.is.

A. Karlsson er fyrirtæki sem selur vörur á sviði heilbrigðismála, húsgögn, eldhúsbúnað og fleira. Fyrirtækið var rekið með hagnaði á árunum 2001-2005. Illa gekk hins vegar í rekstrinum 2006-2007. Tapið var 45 milljónir 2006 og 208 milljónir árið 2007. Tap varð líka á rekstrinum í fyrra.

Kaupendur A. Karlssonar voru tveir, Hraunhólar ehf. sem keypti 51% og Beta ehf. sem keypti 49% hlut. Beta er alfarið í eigu Atorku, en Hraunhólar eru í eigu Lindu B. Gunnlaugsdóttur, forstjóra A. Karlssonar.

Hraunhólar keyptu hlutinn í A. Karlssyni á 510 milljónir og lánaði Atorka allt kaupverðið án þess að setja fram sérstakar tryggingar. Lánið er kúlulán sem greiða átti á síðasta ársfjórðungi 2009.

Hægt er að lesa nánar um málið í Morgunblaðinu í dag.

Greint frá á Mbl.is