Kokkakeppni grunnskólanna

Sigurvegararnir, Aðalsteinn Bjarni Sigurðsson, Ágústa Sólveig Sigurðardóttir og Björg Jósepsdóttir með heilbrigðiráðherra og kennara sínum

Kokkakeppni grunnskólanna var haldin í Menntaskólanum í Kópavogi síðastliðinn laugardag. Voru 16 lið skráð til keppninnar og voru keppendur bæði af höfuðborgarsvæðinu og landsbyggðinni. Var um fjölda rétta að ræða úr margskonar hráefni, bæði fiski og kjöti.

Þau Aðalsteinn Bjarni Sigurðsson, Ágústa Sólveig Sigurðardóttir og Björg Jósepsdóttir, nemendur Hvaleyrarskóla í Hafnarfirði, sigruðu að þessu sinni með réttinum Á brokki sem samnstóð af hrossalund og humarhölum. Þau munu ásamt kennara sínum, Helgu Gunnarsdóttur, fara í sælkeraferð til London í lok maí en styrktaraðilar keppninar leggja ferðina til sem fyrsta vinning.

Í öðru sæti urðu Arna Ýr Guðnadóttir, Heiðdís Ósk Pétursdóttir og Þórunn Sif Ingimundardóttir úr Hamraskóla með réttinn Lostæti hreppstjórans sem var innbökuð nautalund með parmaskinku.

Í þriðja sæti voru nemendur Engjaskóla, þau Karl Ágúst Hreggviðsson, Theodór Páll Theódórsson, Valur Hreggviðsson og Ásgerður Júlía Ágústsdóttir með grillaðan hlýra með tómatsultu og hvítlaukskremi.

Heilbrigðiráðherra Guðlaugur Þór Þórðarsson afhenti verðlaunin og sagði meðal annars við það tilefni að réttirnir hefðu ekki einungis verið glæsilegir heldur líka hollir.

www.kokkakeppni.is

Myndir: Mk.is | Texti Mk.is

[email protected]